#宇宙船 #生物觀察日記
《年尾最後一關》
今年我哋香港人經歷咁多難關，超多比賽，雖然全部都有全力以赴，但係有時都真係想唔只得到好成績，偶然都會想贏下！偏偏勝利取決於太多因素，雖然咁講有啲老土，但係贏有時真係未必靠自己就可以，同輩嘅支持亦都好重要，而想得到呢一啲同輩支持，有時就取決於你平時嘅做人態度，唯獨係呢一點我唔能夠明白，明明我平時對人都幾好，除咗佢哋做咗一啲蠢事嘅時候，咁講都唔啱，應該係話除咗佢哋話俾我知佢哋做咗一啲蠢事嘅時候，基本上我個人都幾忠誠，而且聰明，所以我係唔能夠理解點解每一次投狼人，第一個都一定係懷疑我先，令到我無論係邊一個群組，都會極速就被K.O.，只不過係我聰明！就好快冇得玩。
好快冇得玩有幾個原因，有時係因為因為太聰明，頭一round就會比狼人殺死，有時係因為呢個聰明嘅頭腦如果係狼人陣營嘅話，對村民同埋神職人員就實在太大威脅，所以第一round就算我唔係狼人，都會比村民投票投死！擁有偵探頭腦嘅我根本冇機會得到發揮，我做咗咁多年人，從來都冇感覺過懷才不遇，即使我遇上浪人哩個遊戲！
問題係我嘅抽獎運極差，喺天下三分嘅時局裏面，三份二嘅人張牌都有特別功能，三份一係狼人、三份一係神職人員，而我就永遠都係剩低嗰三份一裏面嘅廢村！係村民！係毫無作用嘅村民，我能夠衍生到最大作用嘅就只有警長呢個身份，所以我每一次都有俾心機去爭取成為警長！但係問題係我個朋友話以我平時嘅人設，就算係警長，都只會係胡迪警長！識唔識玩㗎 ！我哋進入左遊戲世界㗎！得唔到同伴信任，我根本無計可施，而且人設係preset，仲set咗幾十年，根本冇得即刻扭轉，係逆境！「但係2020我都捱得過！哩一個逆境我一樣捱得過！」雖然內心裏面係咁樣講，但係眼前呢班友全部都捱過咗2020 ，一諗到咁樣嘅時候我就覺得自己當堂失去左優勢。
究竟輸啲咩！明明我已經一路玩一路㩒手機，去令到自己嘅投入度跌到有咁低得咁低，去掩飾我對於大家嘅威脅同埋殺傷力，同利用我自己對於遊戲嘅低投入度去表示我只係一個村民。我輸在起跑線嘅原因係一開始無論我係好人定係壞人，就已經要努力去彌清自己嘅嫌疑先，我再睇返其他做浪人嘅人，口供唔一致，冇共同信念，簡稱唔團結，冇默契又要上契，最後變咗全部都係契弟！佢哋需要一個契哥做狼王！去統領大家取得勝利！點解唔係我！但係唔緊要，壞人嘅陣形我根本唔稀罕！每次我抽唔到浪人陣形我都會咁樣諗！我終極目標都係做到警長，維護正義、將真兇緝拿歸案！可惜係一個民主當道嘅社會，全民投票嘅時候，有機會成為黑警嘅人根本冇機會成為警察！同現實嘅世界根本一啲寫實咁都冇，狼人呢個遊戲根本就係架空宇宙裏面嘅一個笑話！
以上內容並不只代表本人立場，以上係我今個星期，觀察完每一個玩完狼人嘅玩家，佢地輸咗之後嘅內心心理變化，如果冇乜嘢，我返屋企砌埋我隻狼王式巴巴托斯算啦。
Search